يَه وَختي ، يَه مينا بَنوشي ، يه سال

يه روزي ، يه چوخا بِه كولي  زِ مال

يه برنو  به دست  و يه اسبِ كَهَر⁽¹⁾

يه هاشُق  گِرهدِن  اَوُن‎⁽²⁾ اِز لَلَر⁽³⁾

يه افتو  شو  و رو ، منِ مالمون

يه مُستي نُخوچي  پَرِشالمون

يَه شِر  روز  و صحرا ، يَه شِر  شَو  به كُه

يه جو اَو  منِ مال  و بَرفو  به كُه

چقد  زنده ايي  ري به را  بي  اُسو⁽⁴⁾

به جا  برزِيَر⁽⁵⁾ كَخُدا  بي  اسو

گُرو  افتو  اِز مالمون  بي خور

شو  و روز  اِز حالمون  بي خَور

نمندَكْ ، نه سر ، نه سواري  به جا

گله  رَ  و مَندك  غُواري  به جا

بيو گو  مَني  مال كنونِ دلُم

چي اورا  منِ آسمونِ دلم

بيو آريوبرزن⁽⁶⁾ اِز نو  بيو

منِ دَو  يكي ني ، تو وادَو  بيو

بيو  تا بِتَرسه  زمين  اِز تيات

بِريسه  هَمِس ، حَرس  و خين  اِز تيات

بيو  بال وا كن  منِ آسمون

بلاكم⁽⁷⁾ بجورم ، زِافتو نشون

بزن بال  و افتونِ  وُردا  بيا

غَلا⁽⁸⁾ حُشك اَبين ، اَونه  وُردا  بيا

بيار اَونه ، اَوسَيلِنه  رَو بُوَن

گُرودَك شِكالِت⁽⁹⁾ ،‌بُو‌‌‌‌ن  گَو⁽¹⁰⁾ بُون

بُون  تا بِوينُم  كه مِردي  هَني

چي افتو ، غُروپْ  اَر نكردي  هني

پَ ايي  صُحوِ جا منده  كي ايرسه

سرِ لَوت  لوخنده  كي ايرسه

پَ كي دي منِ چاله  ايبازه تش

سياهي بَسه ، تا كي ايسازه تش

بُهونا  منِ شو  گُم اَوبيدِنه

پيايل  رَوارَو⁽¹¹⁾ گم اوبيدنه

گُم اَوبي ….. دلم  گسنه‌اي  درد اِيا

وُري  گُل بِرِنْجاسِ⁽¹²⁾ وُردا  بيا

يَه سال  و يه ماه  و يه روزي  كه رَ

وُري  تا بريم  رِزگ⁽¹³⁾ و روزي  كه رَ

يكي ني  بگو  آخه اي آسمون

چه منده  زِ ما ، ‌هِم⁽¹⁴⁾ يه مُست اُستخون

بيو استخونانه ، جَم⁽¹⁵⁾ كُن  خدا

زِدنيا  يه ايلينه ، كم كن  خدا