يه تشي  تش ناده  به شوگارِ شو

تا تموم  وَوبو  بَلاكم⁽¹⁾ كارِشو

يه تشي  اِز آسمون  بِرچ⁽²⁾ ايزنه

چند وخته  به ايي قرون ، برچ ايزنه

گو  وُري!⁽³⁾ تش  خُس تكه  من دستِ شَو

مر ندوني  تا چه همدا⁽⁴⁾ پستِ شو ؟

سر بنه  مِن كُه  و هيجاري بكن

شو  زِ دو  ني‌رِ  وُري  كاري بكن

آرمونِ⁽⁵⁾ شيرِ جنگي , كُشتمه

داغِ ايي  شيرايِ سنگي , كشتمه

كُر وُري  چوخا و مينانه  بيار

تش بزن  شونه ، بهونانه  دِرار

تش بُوَن  مِن چاله  تا افتو  دِرا

شونه وُردا  تا شُلَيل⁽⁶⁾ اِز خَو  درا

رَو بون  مشك  و ملارِ  سي شليل

ري گشوني كن  بهارِ  سي شليل

كُر بگو  حف كن  به كرنا  ميشكال⁽⁷⁾

سربنه  من كُه  و صحرا  ميشكال

مو دلم  سي دي بلالت  تنگ اَوبي

سي اُسو كه  مِن چغاخور⁽⁸⁾ جنگ اَوبي

مو دلم  سي  دايني داينيت  ايي تَپه

سي گَله , سي كُه  و ني شيت⁽⁹⁾ ايي تپه

سر بنه  من كه  و صحرا  تا تَري

جونِ خُت  حُف كن  به كرنا  تا تَري

تا بليطا  سي تو  چو بَوزي كنن

كُه  و صحرانِه  پُرِ سَوزي⁽¹⁰⁾ كنن

گندم  و جو  سيت بوازن⁽¹¹⁾ دَو  به دَو

پازِنا  مستِ بهار  اَوبون , يَهو

تش بكن  تا برفِ سَوزو⁽¹²⁾ اَو  وَبو

تا  تيا چشمه  پرِ برفَو  وَبو

پيت پيتك  تا دلِ افتو  بِره

سر بنه  من دستِ افتو  خَو بِره

پِرپِروكا⁽¹³⁾ هاشُق  اَوبوهن  زِنُو⁽¹⁴⁾

رِي⁽¹⁵⁾ گُل  و شونم  بُوستن  گِلْ پِلو⁽¹⁶⁾

سر بنه  من كُه  و صحرا  زيتري⁽¹⁷⁾

دِي بيو  حُف كن  به كرنا  زيتري

آخه تا كَي  مِن ز‌مستونا  يسير

سَرد اَوبيدك دي , بريم  سي گرمسير

دُر وُري⁽¹⁸⁾ مينا بَنوشِتْ  سَربكن

جووِ⁽¹⁹⁾ و شولارِ نَوته  وَر بكن

وا⁽²⁰⁾ بِريم  تا  مالِ بالا  تَي خدا

تا  بلا كم  پا بنيم  پاپَي⁽²¹⁾ خدا

بِس بگويْم:« اِز ما گُدَشْتِيْ  طَوري نِي

پَشم  اَوبي  هر چي  كه رِشتي  طوري ني

دِي  تو مِردي كن  زِ ايلُم  دَر گُدَرْ

جونِ بستون  اِز سِوِيْلُم⁽²²⁾ دَر گُدَرْ»

(1) شايد     (2) برق ؛ برق مي زند ، مي درخشد      (3) بلند شو     (4) تا چه اندازه        (۵) وی   (6) رعنا،بلند قد ؛صفتي براي معشوقه     (7) مير شكار ؛ تشمال  (8) منطقه اي در چهارمحال و بختياري كه محل ييلاق بعضي از طوايف بختياري بوده  و هست ، جنگ معروفِ « نُه هزار » در اين منطقه به وقوع پيوست    (9) ني چوپاني     (10) سبزه ؛ گل وگياه      (11) برقصند      (12) سبزه كوه ؛ كوهي در خانميرزاي بختياري      (13) پروانه ها   (14) دوباره     (15) رويِ     (16) قلت زدن    (17) زودتر ؛ هر چه زودتر             (18) دُور ؛ دختر      (19) پيراهن    (20) بايستي ؛ بايد      (21) دست به دامان     (22) سبيلم